తెలంగాణ ప్రత్యేక రాష్ట్రం కోసం పోరాడిన నిమ్మతోట రోజా ఘన సన్మానం

ఖమ్మం, జూన్ 9: తెలంగాణ ఆవిర్భావ దినోత్సవాన్ని పురస్కరించుకుని ఖమ్మంలోని అమరవీరుల స్థూపం వద్ద తెలంగాణ ఉద్యమంలో విశేష సేవలందించిన మహిళా యోధులకు ఘన సన్మానం నిర్వహించారు. తెలంగాణ రాష్ట్ర సాధన కోసం ఉద్యమాల్లో పాల్గొని త్యాగాలు చేసిన మహిళల సేవలను స్మరించుకుంటూ ప్రత్యేక కార్యక్రమాన్ని నిర్వహించారు.

ఈ సందర్భంగా సీనియర్ బీఆర్ఎస్ నాయకురాలు, జాతీయ బీసీ సంఘ నాయకురాలు కొరివి ధనలక్ష్మి మాట్లాడుతూ, తెలంగాణ ఉద్యమకారుల సమస్యల పరిష్కారం కోసం ప్రభుత్వం ఏర్పాటు చేసిన కేకే కమిటీ కాలయాపన చేయకుండా అర్హులైన ఉద్యమకారులందరికీ న్యాయం చేయాలని డిమాండ్ చేశారు. ఉద్యమాల్లో ప్రత్యక్షంగా పాల్గొని ఎన్నో కష్టనష్టాలు ఎదుర్కొన్న మహిళలను ప్రత్యేకంగా గుర్తించి గౌరవించాలని ఆమె కోరారు.

తెలంగాణ ఉద్యమంలో పాల్గొన్న ప్రతి ఒక్కరికీ ఎఫ్ఐఆర్‌లు లేదా కేసులు ఉండాల్సిన అవసరం లేదని, కేసులు నమోదు కాకపోయినా గ్రామాలు, పట్టణాల్లో చురుకుగా పనిచేసి ఉద్యమాన్ని ముందుకు నడిపిన మహిళలు ఎంతోమంది ఉన్నారని ధనలక్ష్మి పేర్కొన్నారు. ఉద్యమ సమయంలో సామాజిక, ఆర్థిక, వ్యక్తిగత ఇబ్బందులు ఎదుర్కొంటూనే తెలంగాణ సాధన కోసం కృషి చేసిన మహిళల సేవలు అమూల్యమని ఆమె అన్నారు.

కార్యక్రమంలో తెలంగాణ ఉద్యమంలో పాల్గొన్న మహిళలకు శాలువాలు కప్పి సన్మానించి, వారి సేవలను కొనియాడారు. ఈ సందర్భంగా ఉద్యమంలో మహిళల పాత్రను గుర్తు చేసుకుంటూ, వారి త్యాగాలు భావితరాలకు స్ఫూర్తిగా నిలవాలని పలువురు నేతలు అభిప్రాయపడ్డారు.

ఈ కార్యక్రమంలో పోతురాజు రమాదేవి, బొడ్డు గ్లోరీ, గద్దల మరియాకుమారి, కొమ్ము లక్ష్మి, మెడగిరి పద్మావతి, లింగన్నబోయిన సతీష్, విజయ్ కుమార్, కొరివి చైతన్య మనోహర్, శ్రీలక్ష్మి, షకీన, నిమ్మతోట రోజా, అచ్చమ్మ, రజియా సుల్తానా తదితరులు పాల్గొన్నారు.

తెలంగాణ రాష్ట్ర సాధనలో మహిళలు పోషించిన పాత్ర చిరస్మరణీయమని, వారి అంకితభావం, పోరాటస్ఫూర్తి తెలంగాణ చరిత్రలో ఎప్పటికీ నిలిచిపోతుందని కార్యక్రమంలో పాల్గొన్న నాయకులు పేర్కొన్నారు.