తుంగభద్ర ప్రాజెక్టులో కొత్త క్రస్ట్ గేట్ల ప్రారంభం.. ఒకే వేదికపై ముగ్గురు సీఎంలు

తుంగభద్ర ప్రాజెక్టులో కొత్త క్రస్ట్ గేట్ల ప్రారంభం.. ఒకే వేదికపై ముగ్గురు సీఎంలు

కర్ణాటక రాష్ట్రంలోని హోస్పేట సమీపంలో ఉన్న ప్రతిష్ఠాత్మక తుంగభద్ర ప్రాజెక్టులో నూతనంగా ఏర్పాటు చేసిన 33 క్రస్ట్ గేట్లను బుధవారం ఘనంగా ప్రారంభించారు. కేంద్ర జలశక్తి శాఖ మంత్రి సీఆర్ పాటిల్ సమక్షంలో జరిగిన ఈ కార్యక్రమానికి తెలంగాణ, ఆంధ్రప్రదేశ్, కర్ణాటక రాష్ట్రాల ముఖ్యమంత్రులు హాజరుకావడం విశేషం.

ప్రాజెక్టుకు సంబంధించిన మొత్తం 33 క్రస్ట్ గేట్లను ఆధునిక సాంకేతిక పరిజ్ఞానంతో పునర్నిర్మించారు. ఈ సందర్భంగా కేంద్ర మంత్రి సీఆర్ పాటిల్ మీట నొక్కి 17వ గేటును ప్రారంభించారు. అనంతరం కర్ణాటక ఉప ముఖ్యమంత్రి డీకే శివకుమార్ 18వ గేటును, ఆంధ్రప్రదేశ్ ముఖ్యమంత్రి నారా చంద్రబాబు నాయుడు 19వ గేటును, తెలంగాణ ముఖ్యమంత్రి రేవంత్ రెడ్డి 20వ గేటును ప్రారంభించారు.

గత ఏడాది 2024 ఆగస్టులో తుంగభద్ర నదికి భారీ వరదలు రావడంతో ప్రాజెక్టులోని 19వ గేటు తీవ్రంగా దెబ్బతిన్నది. దీంతో ప్రాజెక్టు భద్రత, నీటి నిర్వహణపై ఆందోళనలు వ్యక్తమయ్యాయి. అనంతరం నిపుణుల కమిటీ పరిస్థితిని సమగ్రంగా పరిశీలించి, మొత్తం గేట్లను ఆధునికీకరించాలని సూచించింది.

ఈ సిఫార్సుల మేరకు రూ.51 కోట్ల వ్యయంతో మొత్తం 33 క్రస్ట్ గేట్లను కొత్తగా ఏర్పాటు చేశారు. గేట్ల పునరుద్ధరణతో ప్రాజెక్టు భద్రత మరింత బలోపేతం కావడంతో పాటు, నీటి నిల్వలు మరియు విడుదల ప్రక్రియ మరింత సమర్థవంతంగా నిర్వహించే అవకాశం ఏర్పడింది.

తుంగభద్ర ప్రాజెక్టు తెలంగాణ, ఆంధ్రప్రదేశ్, కర్ణాటక రాష్ట్రాలకు కీలక జల వనరుగా నిలుస్తోంది. సాగునీరు, తాగునీటి అవసరాలను తీర్చడంలో ఈ ప్రాజెక్టు ప్రధాన పాత్ర పోషిస్తోంది. కొత్త గేట్ల ఏర్పాటు ద్వారా భవిష్యత్తులో వరదల సమయంలో నీటి నిర్వహణ మరింత సమర్థవంతంగా సాగడంతో పాటు రైతులకు, ప్రజలకు ప్రయోజనం చేకూరనుందని అధికారులు తెలిపారు.

ఈ కార్యక్రమం మూడు రాష్ట్రాల మధ్య జలవనరుల నిర్వహణలో సమన్వయానికి ప్రతీకగా నిలిచిందని, తుంగభద్ర ప్రాజెక్టు ఆధునికీకరణలో ఇది ఒక ముఖ్యమైన మైలురాయిగా భావిస్తున్నట్లు అధికారులు పేర్కొన్నారు.