గడల శ్రీనివాస్కు షాక్.. జనసేనలో కలకలం జిల్లా కోఆర్డినేటర్ వేముల కార్తీక్ రాజీనామా
గడల శ్రీనివాస్కు షాక్.. జనసేనలో కలకలం జిల్లా కోఆర్డినేటర్ వేముల కార్తీక్ రాజీనామా
కొత్తగూడెం: భద్రాద్రి కొత్తగూడెం జిల్లాలో జనసేన పార్టీలో అంతర్గత విభేదాలు వెలుగుచూశాయి. ఇటీవల హైదరాబాద్లో జనసేన పార్టీలో చేరిన గడల శ్రీనివాస్ కొత్తగూడెంలో కార్యకర్తల ఆత్మీయ సమావేశాన్ని ఏర్పాటు చేసిన నేపథ్యంలో పార్టీ జిల్లా కోఆర్డినేటర్ వేముల కార్తీక్ తన పదవితో పాటు పార్టీ ప్రాథమిక సభ్యత్వానికి రాజీనామా చేయడం రాజకీయ వర్గాల్లో చర్చనీయాంశంగా మారింది.
వేముల కార్తీక్ 2016 సంవత్సరం నుంచి జనసేన పార్టీ కోసం నిరంతరం పనిచేస్తూ జిల్లాలో పార్టీ బలోపేతానికి కృషి చేశారు. గ్రామీణ స్థాయి నుంచి పార్టీ సిద్ధాంతాలను ప్రజల్లోకి తీసుకెళ్లేందుకు ప్రచార కార్యక్రమాలు, సభ్యత్వ నమోదు, సమావేశాలు, సేవా కార్యక్రమాలు నిర్వహిస్తూ పార్టీ అభివృద్ధికి తన వంతు పాత్ర పోషించినట్లు ఆయన అనుచరులు పేర్కొంటున్నారు.
అయితే, ఇటీవల గడల శ్రీనివాస్ జనసేనలో చేరిన విషయాన్ని తనకు ముందస్తుగా తెలియజేయకపోవడం, కొత్తగూడెంలో నిర్వహించిన కార్యకర్తల ఆత్మీయ సమావేశానికి కూడా తనకు ఎలాంటి ఆహ్వానం అందకపోవడం పట్ల వేముల కార్తీక్ తీవ్ర మనస్తాపానికి గురైనట్లు సమాచారం. పార్టీ కోసం ఎన్నో సంవత్సరాలుగా కష్టపడిన తనను పూర్తిగా పక్కన పెట్టి నిర్ణయాలు తీసుకోవడం బాధ కలిగించిందని ఆయన సన్నిహితుల వద్ద ఆవేదన వ్యక్తం చేసినట్లు తెలుస్తోంది.
ఈ పరిణామాల నేపథ్యంలో వేముల కార్తీక్ పార్టీ జిల్లా కోఆర్డినేటర్ పదవికి, అలాగే జనసేన పార్టీ ప్రాథమిక సభ్యత్వానికి రాజీనామా చేస్తున్నట్లు ప్రకటించారు.
వేముల కార్తీక్ రాజీనామాతో భద్రాద్రి కొత్తగూడెం జిల్లా జనసేనలో రాజకీయ పరిణామాలు వేగంగా మారే అవకాశాలు కనిపిస్తున్నాయి. ఈ రాజీనామాపై పార్టీ రాష్ట్ర నాయకత్వం ఎలా స్పందిస్తుందనేది ఆసక్తికరంగా మారింది. అలాగే గడల శ్రీనివాస్ స్పందన కోసం కూడా కార్యకర్తలు ఎదురుచూస్తున్నారు.
గమనిక: వేముల కార్తీక్ చేసిన ఆరోపణలు ఆయన వైపు నుంచి వచ్చిన సమాచారం ఆధారంగా ఉన్నాయి. దీనిపై జనసేన పార్టీ లేదా గడల శ్రీనివాస్ అధికారికంగా స్పందించాల్సి ఉంది.
Post a Comment