మూడేళ్ల కొడుకును చంపి... మూసీలో విసిరేసిన క్రూర తండ్రి
హైదరాబాద్‌, పాతబస్తీ : నగరంలో మానవత్వాన్ని తలదించుకునే ఘటన వెలుగుచూసింది. కన్న తండ్రే తన మూడేళ్ల కొడుకును క్రూరంగా హత్య చేసి మూసీ ప్రవాహంలో విసిరేశాడు. ఈ విషాదకర ఘటన పాతబస్తీలో వెలుగులోకి రాగా, స్థానికులు షాక్‌కు గురయ్యారు.
ఏసీపీ సుధాకర్ తెలిపిన వివరాల ప్రకారం – బండ్లగూడ నూరినగర్‌కు చెందిన మహ్మద్ అక్బర్ (35), సనాబేగం దంపతులకు ఇద్దరు కుమారులు ఉన్నారు. పెద్ద కుమారుడు ఒక్కేళ్ల వయసులో ఉండగా, రెండో కుమారుడు మహ్మద్ అనాస్ (3) చిన్నప్పటి నుంచి అనారోగ్య సమస్యలతో బాధపడుతున్నాడు. ఈ విషయం దంపతుల మధ్య తరచూ గొడవలకు దారితీసేది.
గత శుక్రవారం రాత్రి భార్య విధులకు వెళ్లిన వేళ, అక్బర్ ఘోర నిర్ణయం తీసుకున్నాడు. తెల్లవారుజామున తన చిన్నారి అనాస్ తలపై దిండు ఉంచి ఊపిరాడకుండా చేసి చంపేశాడు. అనంతరం శవాన్ని సంచిలో పెట్టి బైక్‌పై తీసుకెళ్లి నయాపూల్ బ్రిడ్జ్ వద్ద నుంచి మూసీలో విసిరేశాడు.
అయితే, ఉదయం పోలీస్ స్టేషన్‌కు వెళ్లి తన కొడుకు కనిపించడం లేదని అక్బర్ నాటకం ఆడాడు. బంధువులు తీసుకెళ్లి తిరిగి ఇంటి దగ్గర దింపినట్లు తనకు ఫోన్ చేశారని పోలీసులకు అబద్ధం చెప్పాడు. కానీ, ఫోన్ రికార్డులు, సీసీ కెమెరా ఫుటేజీ పరిశీలించగా అతని అబద్ధాలు బట్టబయలయ్యాయి. అక్బర్ తన కొడుకును సంచిలో పెట్టుకుని తీసుకెళ్తున్న దృశ్యాలు సీసీ టీవీలో రికార్డయ్యాయి.
ఈ సంఘటనతో పాతబస్తీ ప్రాంతంలో కలకలం రేగింది. భార్య సనాబేగం కన్నీరుమున్నీరుగా విలపిస్తోంది. పోలీసులు కేసు నమోదు చేసి దర్యాప్తు చేపట్టగా, మూసీ ప్రవాహంలో చిన్నారి శరీరం కోసం ఎన్డీఆర్ఎఫ్, గజ ఈతగాళ్లు, హైడ్రా పోలీస్ బృందాలు గాలింపు చర్యలు కొనసాగిస్తున్నాయి.
ప్రజలు ఈ ఘటనపై తీవ్ర ఆగ్రహం వ్యక్తం చేస్తూ – “కన్నతండ్రే ఇలా చేస్తే ఇంకెవరు రక్షిస్తారు?” అని ఆవేదన వ్యక్తం చేస్తున్నారు.
Post a Comment