దసరా పండుగ శుభాకాంక్షలు తెలిపిన ముఖ్యమంత్రి రేవంత్ రెడ్డి

హైదరాబాద్, అక్టోబర్ 2 : దసరా పండుగ (విజయదశమి) సందర్భంగా తెలంగాణ రాష్ట్ర ముఖ్యమంత్రి రేవంత్ రెడ్డి  ప్రజలందరికీ హార్దిక శుభాకాంక్షలు తెలిపారు. ఈ సందర్భంగా విడుదల చేసిన తన శుభాకాంక్షల సందేశంలో సీఎం రేవంత్ రెడ్డి మాట్లాడుతూ –“దసరా పండుగ చెడుపై మంచి సాధించిన విజయానికి ప్రతీక. ఇది సత్యం, ధర్మం, న్యాయం సాధించిన దివ్య దినం. మన భారతీయ సాంప్రదాయాలలో, ముఖ్యంగా తెలంగాణ సాంస్కృతిక జీవన విధానంలో ఈ పండుగకు ప్రత్యేకమైన ప్రాధాన్యం ఉంది. ప్రజలందరూ ఆనందోత్సాహాలతో దసరాను జరుపుకోవాలని కోరుకుంటున్నాను” అని పేర్కొన్నారు.

ప్రతి సంవత్సరం ఈ పండుగను ప్రజలు అత్యంత భక్తి, విశ్వాసం, ఉత్సాహంతో జరుపుకుంటారని గుర్తుచేశారు. దసరా ద్వారా సమాజంలో సద్గుణాలు పెంపొందుతాయని, సత్యం ఎల్లప్పుడూ విజయం సాధిస్తుందని ఇది మనకు గుర్తు చేస్తుందని సీఎం అన్నారు.

ప్రజలందరూ దుర్గామాతను ఆరాధించి ఆశీస్సులు పొందాలని, ప్రతి కుటుంబం సుఖసంతోషాలతో, ఆరోగ్యంగా, ఆనందంగా ఉండాలని ఆయన ఆకాంక్షించారు. తెలంగాణ సమాజంలో సౌభ్రాతృత్వం, శాంతి, అభివృద్ధి మరింతగా చిగురించాలని, ప్రజల ఆశయాలు నెరవేరాలని దుర్గామాతను ప్రార్థించినట్లు సీఎం రేవంత్ రెడ్డి తెలిపారు.