డ్రంక్ అండ్ డ్రైవ్కు చెక్: న్యూ ఇయర్ వేళ కఠిన చర్యలు
6 నెలల జైలు, రూ.10 వేల జరిమానా తప్పదని హెచ్చరించిన హైదరాబాద్ సీపీ సజ్జనార్
హైదరాబాద్ నగరంలో న్యూ ఇయర్ వేడుకల నేపథ్యంలో పోలీసులు అప్రమత్తమయ్యారు. మద్యం సేవించి వాహనాలు నడిపే వారిపై కఠిన చర్యలు తప్పవని హైదరాబాద్ పోలీస్ కమిషనర్ సజ్జనార్ స్పష్టమైన హెచ్చరికలు జారీ చేశారు. డ్రంక్ అండ్ డ్రైవ్ కేసుల్లో పట్టుబడితే రూ.10 వేల జరిమానాతో పాటు 6 నెలల జైలు శిక్ష తప్పదని ఆయన తేల్చి చెప్పారు.
డిసెంబర్ 31 రాత్రి నగరవ్యాప్తంగా శాంతి భద్రతలు, రోడ్డు భద్రతపై ప్రత్యేక దృష్టి సారించినట్లు సీపీ తెలిపారు. ఈ క్రమంలోనే నగరంలోని 100 కీలక ప్రాంతాల్లో డ్రంకెన్ డ్రైవ్ తనిఖీలు నిర్వహించనున్నట్లు వెల్లడించారు. ఇందుకోసం ఇప్పటికే 7 ప్లాటూన్ల అదనపు పోలీసు బలగాలను రంగంలోకి దింపినట్లు పేర్కొన్నారు.
వాహనం సీజ్ చేయడమే కాదు.. జైలు తప్పదు
డ్రంక్ అండ్ డ్రైవ్ తనిఖీల్లో పట్టుబడిన వారికి వాహనాన్ని సీజ్ చేయడమే కాకుండా, చట్ట ప్రకారం కేసులు నమోదు చేసి కోర్టుకు హాజరుపరుస్తామని సీపీ సజ్జనార్ తెలిపారు. చట్టాన్ని అతిక్రమిస్తే ఎలాంటి ఉపేక్ష ఉండదని స్పష్టం చేశారు.
రేసింగ్, వీలింగ్, ర్యాష్ డ్రైవింగ్పై ప్రత్యేక నిఘా
న్యూ ఇయర్ వేళ యువత రోడ్లపై రేసింగ్లు, వీలింగ్లు, ర్యాష్ డ్రైవింగ్ వంటి ప్రమాదకర విన్యాసాలకు పాల్పడితే కఠిన చర్యలు తప్పవని హెచ్చరించారు. ఇలాంటి ఘటనల వల్ల అమాయకుల ప్రాణాలు ప్రమాదంలో పడే అవకాశం ఉందని, ప్రజల భద్రతే తమ ప్రధాన లక్ష్యమని సీపీ పేర్కొన్నారు.
ప్రజలకు సూచన
న్యూ ఇయర్ వేడుకలను బాధ్యతాయుతంగా జరుపుకోవాలని, మద్యం సేవించిన తర్వాత వాహనం నడపకుండా క్యాబ్లు, పబ్లిక్ ట్రాన్స్పోర్ట్ను వినియోగించాలని పోలీసులు సూచించారు. చిన్న నిర్లక్ష్యం పెద్ద ప్రమాదంగా మారుతుందని, చట్టానికి లోబడి వ్యవహరించాలని సీపీ సజ్జనార్ విజ్ఞప్తి చేశారు.
Post a Comment