తెలంగాణ గ్రామ పంచాయతీలకు సీఎం రేవంత్ రెడ్డి శుభవార్త

హైదరాబాద్: తెలంగాణ రాష్ట్రంలోని 12,706 గ్రామ పంచాయతీలకు ముఖ్యమంత్రి ఎ. రేవంత్ రెడ్డి శుభవార్త అందించారు. గ్రామ పంచాయతీల సమగ్ర అభివృద్ధి కోసం ముఖ్యమంత్రి ప్రత్యేక నిధి (CM Special Fund) నుంచి స్పెషల్ డెవలప్‌మెంట్ ఫండ్ కింద అదనపు నిధులు అందించనున్నట్లు ప్రకటించారు.

మేజర్ గ్రామ పంచాయతీలకు రూ.10 లక్షలు, చిన్న గ్రామ పంచాయతీలకు రూ.5 లక్షలు చొప్పున నిధులు కేటాయిస్తామని సీఎం వెల్లడించారు. ఈ నిధులు కేంద్ర, రాష్ట్ర ప్రభుత్వాల నుంచి ఇప్పటికే వచ్చే నిధులకు అదనంగా ఉంటాయని స్పష్టం చేశారు. నూతన సంవత్సరంలోనే ఈ ప్రత్యేక నిధులను విడుదల చేస్తామని తెలిపారు.

సర్పంచులే గ్రామాభివృద్ధికి కీలకం

అభివృద్ధి కార్యక్రమాలు సమర్థవంతంగా చేపడితే గ్రామ సర్పంచులకు ప్రజల్లో గౌరవం, విశ్వాసం పెరుగుతుందని సీఎం పేర్కొన్నారు. ప్రతి గ్రామంలో గ్రామ సభలు నిర్వహించి, అవసరాల ఆధారంగా కార్యాచరణ ప్రణాళికలు రూపొందించాలని సూచించారు. దీర్ఘకాలంగా పెండింగ్‌లో ఉన్న సమస్యలను పరిష్కరించి, ప్రజలకు ఇచ్చిన హామీలను నిలబెట్టుకోవాలని సూచించారు.

కొడంగల్‌లో ఆత్మీయ సమ్మేళనం

కొడంగల్ శాసనసభ నియోజకవర్గంలోని కొత్తగా ఎన్నికైన సర్పంచులు, ఉపసర్పంచులు, వార్డు మెంబర్ల కోసం కోస్గీ కేంద్రంలో ఏర్పాటు చేసిన ఆత్మీయ సమావేశంలో ముఖ్యమంత్రి పాల్గొన్నారు. ఈ సందర్భంగా ప్రజా ప్రతినిధులను సత్కరించి అభినందనలు తెలిపారు.

గ్రామ పంచాయతీలకు రూ.3 వేల కోట్లు

ముఖ్యమంత్రి మాట్లాడుతూ, మార్చి 31లోపు గ్రామ పంచాయతీలకు రావాల్సిన రూ.3 వేల కోట్ల నిధులను విడుదల చేయించే బాధ్యత తానే తీసుకుంటానని హామీ ఇచ్చారు. ఎన్నికలు ముగిశాయని, ఇకపై పార్టీలు, పంథాలకు తావులేదని పేర్కొన్నారు. ప్రతి పౌరుడిని కుటుంబ సభ్యుడిగా భావించి ఎలాంటి వివక్ష చూపకుండా సేవ చేయాలని ప్రజాప్రతినిధులకు సూచించారు.

పెండింగ్ ప్రాజెక్టులపై కీలక వ్యాఖ్యలు

గత ప్రభుత్వంలో పూర్తి కాకుండా నిలిచిపోయిన ప్రాజెక్టులను ఒక్కొక్కటిగా ప్రారంభిస్తున్నామని సీఎం తెలిపారు. బీమా, నెట్టెంపాడు, కోయిల్‌సాగర్‌, ఎస్‌ఎల్‌బీసీ, పాలమూరు–రంగారెడ్డి, మక్తల్–నారాయణపేట వంటి ప్రాజెక్టులు గత పదేళ్లలో పూర్తికాలేదని విమర్శించారు. వీటన్నింటినీ పూర్తి చేసి రైతులకు నీరు అందిస్తామని హామీ ఇచ్చారు.

సంక్షేమ కార్యక్రమాలపై సీఎం హామీలు

వచ్చే విద్యా సంవత్సరం నుంచి ప్రభుత్వ పాఠశాలల్లో ఉదయం టిఫిన్‌, మధ్యాహ్న భోజనం
అర్హులైన వారందరికీ కొత్త రేషన్ కార్డులు
3.10 కోట్ల మందికి సన్నబియ్యం సరఫరా
200 యూనిట్లలోపు విద్యుత్ వినియోగానికి ఉచిత విద్యుత్
69 లక్షల రైతులకు రైతు భరోసా
మహిళలకు ఉచిత బస్సు ప్రయాణం
18 సంవత్సరాలు నిండిన ప్రతి ఆడబిడ్డకు ఇందిరమ్మ చీర

ఎవరైనా ఈ పథకాలకు దూరమైతే సర్పంచులు స్వయంగా పేర్లు నమోదు చేయాలని సూచించారు.

కొడంగల్‌ను మోడల్ నియోజకవర్గంగా తీర్చిదిద్దుతాం

కొడంగల్‌ను రాష్ట్రానికి ఆదర్శంగా నిలిచే నియోజకవర్గంగా అభివృద్ధి చేస్తామని సీఎం తెలిపారు. 250 ఎకరాల్లో ఎడ్యుకేషన్ హబ్ ఏర్పాటు చేసి, జూనియర్, డిగ్రీ, అగ్రికల్చర్, మెడికల్ కాలేజీలతో పాటు సైనిక్ స్కూల్ స్థాపిస్తామని వెల్లడించారు. పరిశ్రమలతో ఉపాధి అవకాశాలు పెంచుతామని చెప్పారు.