సర్పంచ్ – ఉప సర్పంచ్‌కు ప్రభుత్వ కఠిన హెచ్చరిక

హైదరాబాద్ / జిల్లా ప్రతినిధి : గ్రామ పంచాయతీల్లో నిధుల నిర్వహణలో సర్పంచ్, ఉప సర్పంచ్‌లకు ఉన్న జాయింట్ చెక్ పవర్ (ఉమ్మడి సంతకం అధికారం)ను దుర్వినియోగం చేస్తే కఠిన చర్యలు తప్పవని ప్రభుత్వం స్పష్టమైన హెచ్చరిక జారీ చేసింది. అభివృద్ధి పనుల నిధులను అడ్డుకోవడం, వ్యక్తిగత లేదా రాజకీయ కారణాలతో చెక్ పవర్‌ను దుర్వినియోగం చేయడం తీవ్ర నేరంగా పరిగణిస్తామని పేర్కొంది.

జాయింట్ చెక్ పవర్ ప్రాముఖ్యత

గ్రామ పంచాయతీ నిధుల నిర్వహణలో పారదర్శకత, భద్రత కోసం సర్పంచ్ – ఉప సర్పంచ్ ఉమ్మడి సంతకం తప్పనిసరి అని ప్రభుత్వం స్పష్టం చేసింది. గ్రామాభివృద్ధి కోసం వెచ్చించే ప్రతి రూపాయికి ఇద్దరి ఆమోదం అవసరమని, ఇది ప్రజాధన రక్షణకు కీలకమైన వ్యవస్థ అని అధికారులు తెలిపారు. అయితే కొన్నిచోట్ల వ్యక్తిగత విభేదాలు, రాజకీయ ఆధిపత్య పోరాటాల వల్ల ఈ చెక్ పవర్ గ్రామాభివృద్ధికి అడ్డంకిగా మారుతోందని ఆందోళన వ్యక్తం చేశారు.

పారదర్శకత పాటిస్తేనే చట్టపరమైన రక్షణ

గ్రామ పంచాయతీ నిధుల వినియోగానికి సంబంధించిన ప్రతి నిర్ణయం తప్పనిసరిగా గ్రామసభ తీర్మానం ఆధారంగానే జరగాలని ఆదేశించారు. నగదు లావాదేవీలకు బదులుగా ఆన్లైన్ చెల్లింపులకు ప్రాధాన్యత ఇవ్వాలని సూచించారు. ఖర్చుల వివరాలను సమయానుకూలంగా రికార్డుల్లో నమోదు చేయాలని, అలా చేస్తే ఆడిట్ తనిఖీల్లో ఎలాంటి సమస్యలు ఉండవని అధికారులు స్పష్టం చేశారు. పారదర్శకత పాటించినప్పుడే ప్రజా ప్రతినిధులకు చట్టపరమైన రక్షణ లభిస్తుందని హెచ్చరించారు.

అధికార దుర్వినియోగానికి కఠిన శిక్షలు

ప్రజాధనాన్ని వ్యక్తిగత అవసరాలకు వాడటం, పనులు పూర్తికాకుండానే బిల్లులు డ్రా చేయడం, తప్పుడు లెక్కలు చూపడం, సంతకాలు ఫోర్జరీ చేయడం వంటి చర్యలను తీవ్రమైన నేరాలుగా పరిగణిస్తామని ప్రభుత్వం తెలిపింది. ఇటువంటి అక్రమాలకు పాల్పడిన వారిపై క్రిమినల్ కేసులు నమోదు చేసి, పదవి నుంచి తొలగించడమే కాకుండా జైలు శిక్ష విధించే అధికారం జిల్లా కలెక్టర్‌కు ఉందని స్పష్టం చేసింది.

ఆధిపత్య పోరుతో అభివృద్ధికి బ్రేక్?

కొన్ని గ్రామాల్లో సర్పంచ్ – ఉప సర్పంచ్‌ల మధ్య ఆధిపత్య పోరు అభివృద్ధి పనులను నిలిపివేస్తోందని అధికారులు గుర్తించారు. రాజకీయ కారణాలతో కావాలనే బిల్లులపై సంతకాలు చేయకుండా పనులను అడ్డుకుంటే ప్రభుత్వం కఠినంగా స్పందిస్తుందని హెచ్చరించింది. విచారణలో గ్రామాభివృద్ధిని అడ్డుకున్నట్లు తేలితే, ఉప సర్పంచ్‌కు ఉన్న చెక్ పవర్‌ను రద్దు చేసే అధికారం కూడా జిల్లా కలెక్టర్‌కు ఉంటుందని ప్రభుత్వం స్పష్టం చేసింది.