ప్రధాన రహదారిపై బైక్ ఢీకొని యువకుడు మృతి

 

భూపాలపల్లి అర్బన్‌లో విషాదం చోటుచేసుకుంది. జిల్లా కేంద్రంలోని ప్రధాన రహదారిపై జరిగిన రోడ్డు ప్రమాదంలో ఓ యువకుడు ప్రాణాలు కోల్పోయాడు.

పోలీసులు తెలిపిన వివరాల ప్రకారం.. పట్టణంలోని యాదవ కాలనీకి చెందిన సురిమిల్ల నయన్ బుధవారం రాత్రి తన బైక్‌పై వెళ్తున్నాడు. ఈ సమయంలో రెడ్డి కాలనీ మూల వద్ద రోడ్డు క్రాస్ చేస్తుండగా ఎదురుగా వేగంగా వచ్చిన మరో బైక్ అతని వాహనాన్ని ఢీకొట్టింది.

ఈ ప్రమాదంలో నయన్ తలకు తీవ్ర గాయాలు కావడంతో వెంటనే సమీపంలోని ప్రైవేట్ ఆసుపత్రికి తరలించారు. అయితే చికిత్స పొందుతూ గురువారం తెల్లవారుజామున ఆయన మృతి చెందాడు.

కుమారుడి మరణాన్ని తట్టుకోలేకపోయినా, అతని అవయవాలను దానం చేయాలని తండ్రి శ్రీనివాస్ నిర్ణయించడం గమనార్హం. కుటుంబ సభ్యుల ఈ నిర్ణయంపై స్థానికులు ప్రశంసలు వ్యక్తం చేస్తున్నారు.

ఈ ఘటనపై కేసు నమోదు చేసి దర్యాప్తు కొనసాగిస్తున్నట్లు పోలీసులు తెలిపారు.