భర్త హత్య కేసులో భార్యే సూత్రధారి.. మరో ఆరుగురితో కలిసి కుట్ర.. నిందితుల అరెస్ట్

 భర్త హత్య కేసులో భార్యే సూత్రధారి.. మరో ఆరుగురితో కలిసి కుట్ర.. నిందితుల అరెస్ట్

మహబూబాబాద్, జూలై 4: మహబూబాబాద్ జిల్లా సింగారం గ్రామంలో మాజీ సర్పంచ్ పిట్టల యాకయ్య హత్య కేసులో సంచలన విషయాలు వెలుగులోకి వచ్చాయి. తొలుత గుర్తుతెలియని వ్యక్తులు చేసిన హత్యగా భావించిన ఈ కేసులో, మృతుడి భార్యే హత్యకు ప్రధాన సూత్రధారిగా వ్యవహరించినట్లు పోలీసులు దర్యాప్తులో గుర్తించారు. ఈ కేసులో భార్యతో పాటు మరో ఆరుగురిని అరెస్ట్ చేసినట్లు జిల్లా ఎస్పీ శబరీష్ వెల్లడించారు.

పోలీసుల వివరాల ప్రకారం, మృతుడు పిట్టల యాకయ్యపై అక్రమ సంబంధాల అనుమానాలతో భార్య యశోద తీవ్ర అసంతృప్తి, ద్వేషం పెంచుకుందని, ఈ నేపథ్యంలో భర్తను హత్య చేయాలని ముందుగానే పథకం రచించినట్లు విచారణలో తేలింది. తనకు సన్నిహితులైన కొందరిని ఈ కుట్రలో భాగస్వాములను చేసి, జూన్ 30 అర్ధరాత్రి నుంచి జూలై 1 తెల్లవారుజామున మధ్య ఇంటి ముందు వరండాలో నిద్రిస్తున్న యాకయ్యపై మారణాయుధాలతో దాడి చేసి హత్య చేసినట్లు పోలీసులు తెలిపారు.

హత్య అనంతరం ఈ ఘటనను దొంగల పని లేదా పాత కక్షల కారణంగా జరిగినట్లు చిత్రీకరించే ప్రయత్నం జరిగినప్పటికీ, పోలీసులు సాంకేతిక ఆధారాలతో అసలు విషయాన్ని వెలికితీశారు. సీసీటీవీ ఫుటేజీలు, మొబైల్ ఫోన్ కాల్ డేటా, టవర్ లొకేషన్లు, నిందితుల కదలికలు, ఇతర శాస్త్రీయ ఆధారాలను విశ్లేషించి కేవలం నాలుగు రోజుల్లోనే కేసును ఛేదించారు.

ఈ కేసులో మృతుడి భార్య పిట్టల యశోద (A-1), గంగుల కృష్ణ (A-2), మోహన్ రెడ్డి (A-3), తుమ్మిడి నర్సమ్మ (A-4), వెంకన్న (A-5), శివ (A-6), కృష్ణమూర్తి (A-7)లను పోలీసులు అరెస్ట్ చేశారు. వారి వద్ద నుంచి హత్యకు ఉపయోగించిన ఆయుధాలు, మొబైల్ ఫోన్లు, కారు సహా పలు కీలక ఆధారాలను స్వాధీనం చేసుకున్నారు.

కేసును వేగంగా, శాస్త్రీయ ఆధారాలతో ఛేదించిన దర్యాప్తు బృందాన్ని జిల్లా ఎస్పీ శబరీష్ అభినందించారు. కేసుకు సంబంధించిన తదుపరి విచారణ కొనసాగుతోందని పోలీసులు తెలిపారు.