మంజీర నది చెక్పోస్ట్ వద్ద భారీగా గంజాయి స్వాధీనం
మంజీర నది చెక్పోస్ట్ వద్ద భారీగా గంజాయి స్వాధీనం
నిజామాబాద్ జిల్లా: పోతంగల్ మండలంలోని మంజీర నది చెక్పోస్ట్ వద్ద పోలీసులు భారీగా గంజాయిని స్వాధీనం చేసుకున్న ఘటన కలకలం రేపింది. ఒడిశా రాష్ట్రం నుంచి మహారాష్ట్రకు గంజాయిని తరలిస్తున్నట్లు గుర్తించిన పోలీసులు నిఘా ఏర్పాటు చేసి, గంజాయి తరలిస్తున్న ఓ వ్యక్తిని అదుపులోకి తీసుకున్నారు.
గంజాయి అక్రమ రవాణా వెనుక మరెవరెవరు ఉన్నారనే కోణంలో పోలీసులు దర్యాప్తు చేపట్టారు. నిందితుడిని విచారిస్తూ గంజాయి ఎక్కడి నుంచి తీసుకువచ్చారు, ఎక్కడికి తరలిస్తున్నారు, ఈ వ్యవహారంలో మరికొందరి ప్రమేయం ఉందా అనే అంశాలపై ఆరా తీస్తున్నారు.
కాగా, కేవలం 15 రోజుల వ్యవధిలోనే ఇదే ప్రాంతంలో రెండోసారి భారీగా గంజాయి పట్టుబడటం పోలీసులకు సవాలుగా మారింది. మంజీర నది చెక్పోస్ట్ పరిసర ప్రాంతాలను అక్రమ రవాణాకు అడ్డాగా ఉపయోగిస్తున్నారా అనే అనుమానాలు వ్యక్తమవుతున్నాయి.
వరుసగా గంజాయి పట్టుబడుతున్న నేపథ్యంలో కోటగిరి పోలీస్ స్టేషన్ పరిధిలో పోలీసులు నిఘాను మరింత ముమ్మరం చేశారు. గంజాయి అక్రమ రవాణా ముఠాల కదలికలపై ప్రత్యేక దృష్టి సారించినట్లు తెలుస్తోంది. ఈ ఘటనతో స్థానికంగా కూడా ఆందోళన వ్యక్తమవుతోంది. పోలీసులు పూర్తి స్థాయిలో దర్యాప్తు చేపట్టి, ఈ అక్రమ రవాణా వెనుక ఉన్న ముఠాను గుర్తించే పనిలో ఉన్నారు.
Post a Comment