వీర్నపల్లిలో 1,340 మందికి ఉచిత కళ్లద్దాల పంపిణీ

 

వీర్నపల్లిలో 1,340 మందికి ఉచిత కళ్లద్దాల పంపిణీ

రాజన్న సిరిసిల్ల జిల్లా: వీర్నపల్లి మండల కేంద్రంలో మాజీ ముఖ్యమంత్రి, బీఆర్‌ఎస్ అధినేత కేసీఆర్‌ చేపట్టిన కంటి వెలుగు కార్యక్రమంలో భాగంగా పెద్ద ఎత్తున ఉచిత కళ్లద్దాల పంపిణీ కార్యక్రమం నిర్వహించారు. ఈ కార్యక్రమంలో బీఆర్‌ఎస్ వర్కింగ్ ప్రెసిడెంట్ కేటీఆర్ (రామన్న) పాల్గొని లబ్ధిదారులకు కళ్లద్దాలను పంపిణీ చేశారు.

వీర్నపల్లి మండలంలోని వివిధ గ్రామాలకు చెందిన ప్రజలకు కంటి పరీక్షలు నిర్వహించి, దృష్టి లోపాలను గుర్తించిన అనంతరం అవసరమైన వారికి ఉచితంగా కళ్లద్దాలు అందజేశారు. మొత్తం 1,340 మందికి కళ్లద్దాలు పంపిణీ చేసినట్లు నిర్వాహకులు తెలిపారు.

కంటి సమస్యలను నిర్లక్ష్యం చేయకుండా ప్రతి ఒక్కరూ క్రమం తప్పకుండా కంటి పరీక్షలు చేయించుకోవాలని కార్యక్రమంలో పాల్గొన్న నాయకులు సూచించారు. కంటి చూపు సమస్యలతో ఇబ్బందులు పడుతున్న పేద, మధ్యతరగతి ప్రజలకు ఉచిత కంటి పరీక్షలు, కళ్లద్దాల పంపిణీ ఎంతో ఉపయోగకరంగా ఉంటుందని పేర్కొన్నారు.

కేసీఆర్‌ ప్రభుత్వ హయాంలో ప్రారంభమైన కంటి వెలుగు కార్యక్రమం ద్వారా రాష్ట్రవ్యాప్తంగా పెద్ద సంఖ్యలో ప్రజలకు కంటి పరీక్షలు నిర్వహించి, అవసరమైన వారికి కళ్లద్దాలు అందించిన విషయాన్ని బీఆర్‌ఎస్ నాయకులు గుర్తుచేశారు. ప్రజల ఆరోగ్యంపై దృష్టి సారించి ఇలాంటి కార్యక్రమాలను కొనసాగించాల్సిన అవసరం ఉందన్నారు.

వీర్నల్లిలో నిర్వహించిన ఈ కార్యక్రమానికి బీఆర్‌ఎస్‌ నాయకులు, కార్యకర్తలు, స్థానిక ప్రజలు పెద్ద సంఖ్యలో హాజరయ్యారు. ఉచితంగా కళ్లద్దాలు అందుకోవడంతో లబ్ధిదారులు సంతోషం వ్యక్తం చేశారు. ప్రజలకు ఉపయోగపడే ఆరోగ్య కార్యక్రమాలను మరింత విస్తృతంగా నిర్వహించాలని వారు కోరారు.