భద్రాచలంలో గోదావరి పుష్కర ఘాట్ల నిర్మాణాలకు శ్రీకారం

భద్రాచలంలో గోదావరి పుష్కర ఘాట్ల నిర్మాణాలకు శ్రీకారం రూ.49 కోట్లతో మూడు విడతల్లో పనులు.. వచ్చే ఏడాది మార్చిలోగా పూర్తి

భద్రాచలం, ఆగస్టు 29: భద్రాచలంలో వచ్చే ఏడాది జరగనున్న గోదావరి పుష్కరాలు–2027ను దృష్టిలో ఉంచుకుని పుష్కర ఘాట్ల నిర్మాణ పనులకు శనివారం శ్రీకారం చుట్టారు. గోదావరి పరివాహక ప్రాంతంలో చేపట్టనున్న ఈ పనుల ప్రారంభోత్సవంలో భద్రాద్రి కొత్తగూడెం జిల్లా కలెక్టర్ అంకిత్, భద్రాచలం ఎమ్మెల్యే డాక్టర్ తెల్లం వెంకట్రావు ముఖ్య అతిథులుగా పాల్గొన్నారు. వేద పండితుల ఆధ్వర్యంలో ప్రత్యేక పూజలు నిర్వహించిన అనంతరం జేసీబీతో మట్టి తొలగించి పనులను ప్రారంభించారు.

గోదావరి పుష్కరాలకు దేశవ్యాప్తంగా పెద్ద సంఖ్యలో భక్తులు భద్రాచలానికి తరలివచ్చే అవకాశం ఉన్నందున, భక్తులకు ఎలాంటి అసౌకర్యం కలగకుండా ముందస్తు ప్రణాళికతో మౌలిక వసతులను అభివృద్ధి చేస్తున్నట్లు అధికారులు తెలిపారు.

మూడు విడతల్లో రూ.49 కోట్లతో పనులు

ఈ సందర్భంగా జిల్లా కలెక్టర్ అంకిత్ మాట్లాడుతూ గోదావరి పుష్కరాలు–2027 కోసం మూడు విడతల్లో పుష్కర ఘాట్ల నిర్మాణ పనులు చేపడుతున్నట్లు తెలిపారు. తొలి విడత పనులకు రాష్ట్ర ప్రభుత్వం రూ.46.65 కోట్లు కేటాయించిందన్నారు. రెండో విడతలో రూ.1.75 కోట్లు, మూడో విడతలో రూ.60 లక్షలు వెచ్చించనున్నట్లు వివరించారు. మొత్తం సుమారు రూ.49 కోట్లతో పుష్కర ఘాట్లు, అనుబంధ అభివృద్ధి పనులు చేపట్టనున్నట్లు తెలిపారు.

వచ్చే ఏడాది మార్చి నాటికి అన్ని పనులను పూర్తి చేసేలా అధికారులు సమన్వయంతో పనిచేయాలని ఆదేశించారు. తొలుత భద్రాచలంలో పుష్కర ఘాట్ పనులు చేపట్టి, అనంతరం దుమ్ముగూడెం మండలంలోని పర్ణశాల, బూర్గంపాడు మండలంలోని మోతే పట్టినగర్ ప్రాంతాల్లో పనులు కొనసాగుతాయని తెలిపారు. అనంతరం ములుగు జిల్లాలోని చిన్నరావిగూడెం, రామానుజావరం, రామచంద్రాపురం ప్రాంతాల్లో కూడా పుష్కర ఘాట్ల నిర్మాణ పనులు చేపట్టనున్నట్లు వెల్లడించారు.

భక్తులకు అన్ని సౌకర్యాలు కల్పించాలి

భద్రాచలం ఎమ్మెల్యే డాక్టర్ తెల్లం వెంకట్రావు మాట్లాడుతూ తెలంగాణ–ఆంధ్రప్రదేశ్ రాష్ట్రాల సరిహద్దు ప్రాంతాల్లో వచ్చే ఏడాది జూన్, జూలై నెలల్లో జరగనున్న గోదావరి పుష్కరాలకు వచ్చే భక్తులకు ఎలాంటి ఇబ్బందులు లేకుండా ఏర్పాట్లు చేయాలని అధికారులకు సూచించారు. వాజేడు, వెంకటాపురం తదితర సరిహద్దు ప్రాంతాల్లో కూడా పుష్కర ఘాట్ల అభివృద్ధి పనులు చేపట్టనున్నట్లు తెలిపారు.

పుష్కర ఘాట్ల వద్ద స్నానాల ఘాట్లు, మరుగుదొడ్లు, తాగునీరు, పారిశుద్ధ్యం, రహదారులు, ఇతర మౌలిక వసతులను పకడ్బందీగా ఏర్పాటు చేయాలని సూచించారు. భక్తుల రద్దీని దృష్టిలో ఉంచుకుని రాకపోకలకు ఎలాంటి ఇబ్బందులు తలెత్తకుండా ముందస్తు ప్రణాళిక రూపొందించాలని అధికారులను కోరారు.

కరకట్ట సర్వీస్ రోడ్డుపై ప్రత్యేక దృష్టి

భద్రాచలం కరకట్ట ప్రాంతంలో సర్వీస్ రోడ్డును పూర్తిస్థాయిలో అభివృద్ధి చేసేందుకు ఆర్‌అండ్‌బీ అధికారులు ప్రత్యేక ప్రణాళిక రూపొందించి పనులు చేపట్టాలని ఎమ్మెల్యే సూచించారు. పుష్కరాల సమయంలో వాహనాల రాకపోకలు పెరిగే అవకాశం ఉన్నందున ట్రాఫిక్ సమస్యలు తలెత్తకుండా రహదారి సౌకర్యాలను మెరుగుపరచాల్సిన అవసరం ఉందన్నారు.

అదేవిధంగా భద్రాచలం శ్రీ సీతారామచంద్రస్వామి దేవస్థానం అభివృద్ధి, మరమ్మతు పనులు ప్రస్తుతం రాష్ట్ర ప్రభుత్వం మంజూరు చేసిన రూ.351 కోట్లతో కొనసాగుతున్నాయని ఎమ్మెల్యే తెలిపారు. దేవాలయ అభివృద్ధి పనులను జిల్లా కలెక్టర్ అంకిత్, సంబంధిత అధికారులు నిరంతరం సమీక్షిస్తూ వేగవంతం చేస్తున్నారని చెప్పారు. పుష్కర పనులను కూడా నిర్ణీత గడువులోగా పూర్తి చేసేందుకు అన్ని శాఖల అధికారులు సమన్వయంతో పనిచేయాలని కోరారు.

భద్రాచలం ప్రాంతాన్ని తెలంగాణ ప్రభుత్వం ప్రత్యేక శ్రద్ధతో అభివృద్ధి చేస్తోందని ఎమ్మెల్యే పేర్కొన్నారు. గోదావరి పుష్కరాలను ఘనంగా నిర్వహించి భక్తులకు ఎలాంటి ఇబ్బందులు లేకుండా అన్ని ఏర్పాట్లు పూర్తి చేస్తామని తెలిపారు.

ఈ కార్యక్రమంలో భద్రాచలం టెంపుల్ ఈఓ దామోదర్ రావు, మాజీ ఎమ్మెల్సీ బాలసాని లక్ష్మీనారాయణ, ఇరిగేషన్ సీఈ శ్రీనివాస్ రెడ్డి, ఎస్‌ఈ మహేశ్వరరావు, డీఈ సబ్ డివిజన్–1 భాగ్యరాజ్ రాథోడ్, ఈఈ జానీ, భద్రాచలం సర్పంచ్ పునేం కృష్ణ, పంచాయతీ ఈఓ శ్రీనివాస్, తహసీల్దార్ రవి, వార్డు సభ్యులు సుబ్బారావు, స్థానికులు భోగాల శ్రీనివాస్ రెడ్డి, బుడగం శ్రీనివాస్, ఏఈఈ రవితేజ తదితరులు పాల్గొన్నారు.