బాలికల బాత్రూములో సీక్రెట్ కెమెరాలు పెట్టిన అటెండర్‌పై పోక్సో కేసు

కరీంనగర్ జిల్లా, అక్టోబర్ 28: కరీంనగర్ జిల్లా గంగాధర మండలం కురిక్యాల ప్రభుత్వ పాఠశాలలో జరిగిన ఘోర ఘటన వెలుగుచూసింది. బాలికల బాత్రూములో సీక్రెట్ కెమెరాలు అమర్చిన అటెండర్ యాకుబ్ భాషాపై అధికారులు కఠిన చర్యలు తీసుకున్నారు.

సమాచారం ప్రకారం, పాఠశాలలో పలు కార్యక్రమాల సందర్భంగా విద్యార్థినుల ఫోటోలు, వీడియోలు తీసి, ఆ ఫొటోలను కృత్రిమ మేధ (AI) సహాయంతో అసభ్యకరంగా మార్ఫింగ్ చేసినట్లు బయటపడింది. ఆ మార్ఫింగ్ ఫోటోలను చూపిస్తూ ఆరుగురు బాలికలపై లైంగిక వేధింపులకు పాల్పడినట్లు దర్యాప్తులో తేలింది.

వారం రోజుల క్రితం కొందరు విద్యార్థినులు బాత్రూములో అనుమానాస్పద పరికరాన్ని గమనించి తల్లిదండ్రులకు సమాచారం ఇచ్చారు. వెంటనే అధికారులు విచారణ చేపట్టి, సీసీ కెమెరాలను గుర్తించారు. దర్యాప్తు అనంతరం నిందితుడు యాకుబ్ భాషాపై పోక్సో (POCSO) చట్టం కింద కేసు నమోదు చేసి, సస్పెండ్ చేస్తూ విద్యాశాఖ ఉత్తర్వులు జారీ చేసింది.

ఈ ఘటనపై స్థానికులు తీవ్ర ఆగ్రహం వ్యక్తం చేస్తూ, నిందితుడిపై కఠిన చర్యలు తీసుకోవాలని డిమాండ్ చేస్తున్నారు. విద్యార్థినుల భద్రతను కాపాడడంలో నిర్లక్ష్యం చూపిన వారిపైనా విచారణ కొనసాగుతోంది.