సత్య సాయి మహా సమాధిని దర్శించుకున్న ప్రధాని నరేంద్ర మోదీ!

పుట్టపర్తి నవంబర్ 19: పుట్టపర్తి ప్రశాంతి నిలయానికి బుధవారం ప్రధాన మంత్రి నరేంద్ర మోదీ చేరుకున్నారు. శ్రీ సత్యసాయి బాబా శతజయంతి ఉత్సవాల్లో ముఖ్య అతిథిగా పాల్గొన్న ఆయన, మహాసమాధికి నివాళులు అర్పించారు.

ఈ సందర్భంగా ప్రధాని మోదీ మాట్లాడుతూ— “మానవ సేవే మాధవ సేవ” అన్న సత్యసాయి బోధనలు ప్రపంచమంతటా మార్గదర్శకంగా మారాయని అన్నారు. సత్యసాయి జయంత్యుత్సవాల్లో పాల్గొనడం తనకు అదృష్టంగా భావిస్తున్నానని పేర్కొన్నారు. ఆధ్యాత్మిక కాంతితో నిండిన పుట్టపర్తి పవిత్ర భూమిలో సత్యసాయి బాబా ప్రేమ తత్త్వాలు యుగయుగాల పాటు వెలిగిపోతాయన్నారు.

శ్రీ సత్యసాయి జిల్లా పుట్టపర్తిలో నవంబర్ 23 వరకు శతజయంతి వేడుకలు ఘనంగా జరగనున్నాయి. సాయి నామస్మరణతో పురవీధులన్నీ మార్మోగుతున్నాయి. వేలాది భక్తులు, ప్రముఖులు ప్రశాంతి నిలయానికి తరలివస్తున్నారు.

సత్యసాయి బోధనలు అనేక మందిని సేవా మార్గంలో నడిపించాయని ప్రధాని పేర్కొన్నారు. “అందరినీ ప్రేమించు… అందరినీ సేవించు” అన్న ఆయన సందేశం ప్రపంచం నలుమూలలా వేలాది జీవితాలను మార్చిందని గుర్తుచేశారు. తాగునీరు, విద్య, వైద్యం రంగాల్లో సత్యసాయి చేపట్టిన సేవా కార్యక్రమాలు సమాజ నిర్మాణంలో కీలక మైలురాళ్లని ప్రధాన మంత్రి మెచ్చుకున్నారు.

ఈ సందర్భంగా సత్యసాయి శత జయంతి స్మారకార్థం రూపుదిద్దుకున్న రూ.100 నాణెం మరియు నాలుగు తపాలా బిళ్లలను నరేంద్ర మోదీ ఆవిష్కరించారు.

కార్యక్రమానికి ఆంధ్రప్రదేశ్ సీఎం నారా చంద్రబాబు నాయుడు, డిప్యూటీ సీఎం పవన్ కల్యాణ్, క్రికెట్ దిగ్గజం సచిన్ టెండూల్కర్, సినీ నటి ఐశ్వర్య రాయ్ సహా పలువురు ప్రముఖులు హాజరయ్యారు.