యువతకు జాబ్ గ్యారెంటీతో ఉచిత స్కిల్ ట్రైనింగ్– జిల్లా కలెక్టర్ జితేష్ వి. పాటిల్

 

భద్రాద్రి కొత్తగూడెం జిల్లాలోని నిరుద్యోగ యువతి, యువకులకు ఉపాధి అవకాశాలు కల్పించాలనే లక్ష్యంతో జిల్లా యంత్రాంగం ఆధ్వర్యంలో LSC (Logistics Skill Council) మరియు Redington Foundation (COLTE) సహకారంతో జాబ్ గ్యారెంటీతో కూడిన ఉచిత స్కిల్ ట్రైనింగ్ కార్యక్రమం అమలు చేస్తున్నట్లు జిల్లా కలెక్టర్ జితేష్ వి. పాటిల్ తెలిపారు.

ఈ కార్యక్రమం ద్వారా లాజిస్టిక్స్ రంగానికి సంబంధించిన వివిధ విభాగాల్లో నైపుణ్య శిక్షణ అందించడంతో పాటు, శిక్షణ పూర్తైన అనంతరం 100 శాతం ప్లేస్‌మెంట్‌తో ఉద్యోగ అవకాశాలు కల్పించనున్నట్లు ఆయన స్పష్టం చేశారు.

ఇప్పటికే 24-12-2025 న జిల్లా కలెక్టర్ కార్యాలయంలో నిర్వహించిన ఎంపిక డ్రైవ్‌లో 29 మంది అభ్యర్థులు ఎంపికయ్యారని, మొత్తం 51 మంది యువతి, యువకులు శిక్షణకు హాజరయ్యారని కలెక్టర్ తెలిపారు.

మరింత మందికి అవకాశం కల్పించేందుకు డిసెంబర్ 27, 2025 ఉదయం 10.30 గంటలకు జిల్లా కలెక్టర్ కార్యాలయంలో మరో ప్రత్యేక ఎంపిక డ్రైవ్ నిర్వహించి అదనంగా 50 మంది యువతను ఎంపిక చేయనున్నట్లు ఆయన వెల్లడించారు.

ఈ శిక్షణలో వేర్‌హౌస్ స్టోర్ కీపర్, సప్లై చైన్ అసోసియేట్, ఎక్స్‌పోర్ట్ – ఇంపోర్ట్ ఎగ్జిక్యూటివ్, వంటి కోర్సులు అందుబాటులో ఉంటాయని తెలిపారు. 10వ తరగతి నుంచి గ్రాడ్యుయేషన్ వరకు అర్హత కలిగి, 18 నుంచి 27 సంవత్సరాల వయస్సు ఉన్న యువతి, యువకులు ఈ శిక్షణకు అర్హులని తెలిపారు.

శిక్షణ అనంతరం నెలకు రూ.13,000 నుంచి రూ.18,000 వరకు జీతంతో ఉద్యోగ అవకాశాలు కల్పించనున్నట్లు తెలిపారు. ఈ శిక్షణ పూర్తిగా ఉచితం, స్కిల్ ఇండియా సర్టిఫికేషన్‌తో పాటు భోజనం, వసతి సౌకర్యాలు కూడా ఉంటాయని పేర్కొన్నారు. జిల్లాలోని నిరుద్యోగ యువత ఈ అవకాశాన్ని సద్వినియోగం చేసుకోవాలని జిల్లా కలెక్టర్ జితేష్ వి. పాటిల్ పిలుపునిచ్చారు.