బీజేపీ కార్యాలయాల ముట్టడికి ఏఐసీసీ పిలుపు గాంధీభవన్ వద్ద భారీగా మోహరించిన పోలీసులు

హైదరాబాద్, డిసెంబర్ 18: జాతీయ ఉపాధి హామీ పథకానికి మహాత్మా గాంధీ పేరును తొలగించాలనే కేంద్రంలోని మోదీ ప్రభుత్వ తాజా నిర్ణయంపై కాంగ్రెస్ పార్టీ తీవ్ర ఆగ్రహం వ్యక్తం చేస్తోంది. ఈ నిర్ణయాన్ని వ్యతిరేకిస్తూ దేశవ్యాప్తంగా బీజేపీ కార్యాలయాల ఎదుట నిరసనలు చేపట్టాలని ఆల్ ఇండియా కాంగ్రెస్ కమిటీ (ఏఐసీసీ) పార్టీ శ్రేణులకు పిలుపునిచ్చింది.

ఇదే క్రమంలో, నేషనల్ హెరాల్డ్ కేసు నేపథ్యంలోనూ బీజేపీ ప్రభుత్వ వైఖరిని నిరసిస్తూ, తెలంగాణ వ్యాప్తంగా బీజేపీ కార్యాలయాల ఎదుట ధర్నాలు నిర్వహించాలని టీపీసీసీ అధ్యక్షుడు మహేష్ కుమార్ గౌడ్ నిర్ణయించారు. ఏఐసీసీ పిలుపు మేరకు గురువారం రాష్ట్రవ్యాప్తంగా కాంగ్రెస్ కార్యకర్తలు రోడ్డెక్కనున్నారు.

గాంధీభవన్ వద్ద భద్రత కట్టుదిట్టం

ఈ నేపథ్యంలో హైదరాబాద్‌లోని గాంధీభవన్ వద్ద గురువారం ఉదయం నుంచే భారీగా పోలీసు బలగాలను మోహరించారు. ఎలాంటి అవాంఛనీయ ఘటనలు జరగకుండా ముందస్తు చర్యలుగా పోలీసులు గట్టి భద్రతా ఏర్పాట్లు చేపట్టారు. మరోవైపు నాంపల్లి ప్రాంతంలోని బీజేపీ రాష్ట్ర కార్యాలయం వద్ద బ్యారికేడ్లు ఏర్పాటు చేసి, రాకపోకలను నియంత్రిస్తున్నారు.

నేషనల్ హెరాల్డ్ కేసుపై కాంగ్రెస్ స్పందన

నేషనల్ హెరాల్డ్ కేసులో కాంగ్రెస్ అగ్రనేతలు సోనియా గాంధీ, రాహుల్ గాంధీలకు ఇటీవల కొంత ఊరట లభించింది. ఈ కేసులో వారి సహా మరో ఐదుగురిపై ఎన్‌ఫోర్స్‌మెంట్ డైరెక్టరేట్ దాఖలు చేసిన ఛార్జ్‌షీట్‌ను పరిగణనలోకి తీసుకోవడానికి ఢిల్లీ హైకోర్టు నిరాకరించింది. దీంతో “చివరికి సత్యమే గెలిచింది” అంటూ కాంగ్రెస్ నేతలు వ్యాఖ్యానించారు.

అయితే, బీజేపీ నేతృత్వంలోని కేంద్ర ప్రభుత్వం రాజకీయ ప్రతీకారంతో ఈడీని దుర్వినియోగం చేస్తూ తమ నాయకులపై తప్పుడు కేసులు నమోదు చేస్తోందని కాంగ్రెస్ ఆరోపిస్తోంది.

నాంపల్లి బీజేపీ కార్యాలయానికి ర్యాలీ

ఏఐసీసీ పిలుపు మేరకు టీపీసీసీ చీఫ్ మహేష్ కుమార్ గౌడ్ ఆధ్వర్యంలో గాంధీభవన్ నుంచి నాంపల్లి బీజేపీ రాష్ట్ర కార్యాలయం వరకు భారీ ర్యాలీ నిర్వహించేందుకు కాంగ్రెస్ నేతలు సిద్ధమయ్యారు. ఈ నేపథ్యంలో కాంగ్రెస్, బీజేపీ కార్యాలయాల ఎదుట భారీగా పోలీసు బలగాలు మోహరించడంతో నగరంలో ఉద్రిక్త వాతావరణం నెలకొంది.