బయటపడ్డ అమ్మవారి విగ్రహం.. నేలమాలిగలో భక్తుల పోటెత్తు, ప్రత్యేక పూజలు

మంచిర్యాల | డిసెంబర్ 15: మంచిర్యాల జిల్లా ముల్కల మండలం నేలమాలిగ గ్రామంలో అమ్మవారి విగ్రహం బయటపడటం స్థానికంగా సంచలనం సృష్టించింది. సింహవాహనంపై కూర్చున్న దుర్గాదేవి విగ్రహం వెలుగులోకి రావడంతో చుట్టుపక్కల గ్రామాల నుంచి భక్తులు పెద్ద సంఖ్యలో తరలివచ్చారు.

అమ్మవారి విగ్రహానికి పసుపు, కుంకుమలతో ప్రత్యేక పూజలు నిర్వహించారు. భక్తుల రాకతో ఆ ప్రాంతమంతా జనంతో కిక్కిరిసి పోయింది. పరిస్థితిని అదుపులో ఉంచేందుకు పోలీసులు రంగంలోకి దిగి, భక్తులు క్యూలైన్ పాటించాలని సూచించారు. ఒక దశలో గుంపును నియంత్రించడం పోలీసులకు కష్టసాధ్యంగా మారింది.

గోదావరి పరిక్రమ యాత్రతో వెలుగులోకి వచ్చిన విషయం

ఉత్తరప్రదేశ్ అయోధ్య రామమందిర పూజారితో పాటు పలువురు పీఠాధిపతులు, స్వామీజీలు చేపట్టిన గోదావరి పరిక్రమ యాత్ర డిసెంబర్ 12న మంచిర్యాల జిల్లాకు చేరుకుంది. ఈ సందర్భంగా ముల్కల మండలం నేలమాలిగలో గోదావరి పుష్కరఘాట్‌కు వెళ్లే మార్గంలోని ఒక ప్రాంతాన్ని చూపిస్తూ, అక్కడ ఏదో దివ్యశక్తి ఉందని వారు పేర్కొన్నారు.

దీనికి సంబంధించిన వీడియోలు సోషల్ మీడియాలో వైరల్ కావడంతో స్థానికుల్లో ఆసక్తి పెరిగింది.

తవ్వకాల్లో వెలుగు చూసిన దుర్గాదేవి విగ్రహం

స్థల యజమాని అనుమతి తీసుకున్న అనంతరం గ్రామస్తులు ఆ ప్రాంతంలో ప్రత్యేక పూజలు నిర్వహిస్తూ తవ్వకాలు చేపట్టారు. ఈ తవ్వకాల్లో సింహంపై కూర్చున్న దుర్గాదేవి విగ్రహం బయటపడింది. వెంటనే అమ్మవారికి ప్రత్యేక పూజలు నిర్వహించారు.

గ్రామస్తుల్లో ఆనందోత్సాహం

అమ్మవారి విగ్రహం వెలుగులోకి రావడం తమ గ్రామానికి దైవానుగ్రహమని గ్రామస్తులు ఆనందం వ్యక్తం చేస్తున్నారు. ఈ ఘటనతో నేలమాలిగ గ్రామం ఆధ్యాత్మిక ప్రాధాన్యతను సంతరించుకుందని భక్తులు భావిస్తున్నారు.