సమ్మక్క–సారలమ్మ హుండీ లెక్కింపు ప్రారంభం తొలి రోజే రూ.2.49 కోట్ల ఆదాయం

 

మేడారం | ఆసియాలోనే అతిపెద్ద గిరిజన జాతరగా పేరొందిన సమ్మక్క–సారలమ్మ జాతరలో భక్తులు సమర్పించిన హుండీ కానుకల లెక్కింపు ప్రక్రియ ఘనంగా ప్రారంభమైంది. హన్మకొండలోని టీటీడీ కళ్యాణ మండపంలో గురువారం ఉదయం దేవాదాయ శాఖ అధికారుల ఆధ్వర్యంలో హుండీల లెక్కింపును చేపట్టారు.

లెక్కింపు తొలి రోజు మొత్తం 125 హుండీలను తెరవగా, వాటి ద్వారా రూ.2,49,65,000 నగదు ఆదాయం సమకూరినట్లు అధికారులు వెల్లడించారు. భక్తులు తమ మొక్కుల రూపంలో పెద్ద మొత్తంలో నగదు సమర్పించడంతో ఆదాయం గణనీయంగా పెరిగినట్లు తెలిపారు.

ఈ హుండీ లెక్కింపు ప్రక్రియ మొత్తం దేవాదాయ శాఖ ఉన్నతాధికారులు, సేవా సమితి సభ్యుల ప్రత్యక్ష పర్యవేక్షణలో అత్యంత పారదర్శకంగా కొనసాగుతోంది. నగదితో పాటు భక్తులు సమర్పించిన బంగారం, వెండి కానుకలను ప్రత్యేకంగా వేరు చేసి నమోదు చేశారు.

భద్రతా కారణాల దృష్ట్యా లెక్కింపు పూర్తయిన బంగారం, వెండి వస్తువులను ప్రత్యేక ఇనుప హుండీలలో భద్రపరిచి, వాటికి తాళాలు వేసి కట్టుదిట్టమైన భద్రత ఏర్పాటు చేసినట్లు అధికారులు తెలిపారు. రానున్న రోజుల్లో మిగిలిన హుండీల లెక్కింపును కూడా ఇదే విధంగా కొనసాగిస్తామని పేర్కొన్నారు.