ప్రతి కుటుంబం ఒక చెట్టును పెంచాలి: మంత్రి కొండా సురేఖ పిలుపు

 

దూలపల్లిలోని తెలంగాణ ఫారెస్ట్ అకాడమీలో నిర్వహించిన ప్రపంచ అటవీ దినోత్సవ వేడుకలు ఘనంగా జరిగాయి. ఈ కార్యక్రమానికి ముఖ్య అతిథిగా హాజరైన మంత్రి కొండా సురేఖ జ్యోతి ప్రజ్వలన చేసి కార్యక్రమాన్ని ప్రారంభించారు.

ఈ సందర్భంగా మంత్రి మాట్లాడుతూ, అడవులు మన జీవనానికి పునాది అని, పర్యావరణ సమతుల్యతకు అవి అత్యంత అవసరమని పేర్కొన్నారు. అడవులను సంరక్షించడం ప్రతి ఒక్కరి బాధ్యత అని ఆమె స్పష్టం చేశారు.

“వృక్షో రక్షతి రక్షితః” అనే సూక్తిని స్మరించుకుంటూ, చెట్లను కాపాడితేనే మన భవిష్యత్తు సురక్షితమవుతుందని తెలిపారు. ప్రతి ఇంటిలో కనీసం ఒక మొక్కను నాటాలని, ప్రతి కుటుంబం ఒక చెట్టును పెంచే బాధ్యత తీసుకోవాలని ప్రజలకు పిలుపునిచ్చారు.

పర్యావరణ పరిరక్షణలో భాగంగా చెట్ల పెంపకాన్ని సామూహిక ఉద్యమంగా తీసుకెళ్లాలని, తద్వారా భావి తరాలకు స్వచ్ఛమైన ప్రకృతి అందించవచ్చని మంత్రి కొండా సురేఖ ఆకాంక్ష వ్యక్తం చేశారు.