ఈద్ సందేశం ప్రేమ, సోదరభావం మరియు మానవత్వానికి ప్రతీక

 

పెద్దపల్లి జిల్లాలో ఆల్ ఇండియా ఐడియల్ టీచర్స్ అసోసియేషన్ (AIITA) ఆధ్వర్యంలో ఈద్ మిలాప్ కార్యక్రమం ఘనంగా జరిగింది. గోదావరిఖని లక్ష్మీనగర్‌లోని జామా మసీదులో ఆదివారం నిర్వహించిన ఈ కార్యక్రమం స్నేహభావం, సామరస్యానికి ప్రతీకగా నిలిచింది.

కార్యక్రమం మౌలానా మునవ్వర్ అలీ సాహెబ్ ఖురాన్ పఠనంతో ప్రారంభమైంది. ముఖ్య అతిథిగా హాజరైన జిల్లా కార్యదర్శి మౌలానా హఫీజ్ సయ్యద్ ఇమ్రాన్ సుఫీ తన ప్రసంగంతో అందరినీ ఆకట్టుకున్నారు. ఆయన మాట్లాడుతూ, ఉపాధ్యాయ సంఘాలు పరస్పర విభేదాలను పక్కనపెట్టి ఒకే లక్ష్యంతో పని చేస్తే ఉపాధ్యాయుల సమస్యల పరిష్కారంతో పాటు విద్యా నాణ్యతను కూడా మెరుగుపరచవచ్చని తెలిపారు.

ఉపాధ్యాయుల హక్కుల పరిరక్షణ, వృత్తిపరమైన అభివృద్ధి, విద్యార్థులకు నాణ్యమైన విద్య అందించడం అత్యవసరమని వక్తలు అభిప్రాయపడ్డారు. సమాజ నిర్మాణంలో ఉపాధ్యాయుల పాత్ర కీలకమని, వారి సంక్షేమం కోసం అందరూ కృషి చేయాల్సిన అవసరం ఉందని నొక్కిచెప్పారు.

ఈ కార్యక్రమానికి న్యాయవాది తాజుద్దీన్ అధ్యక్షత వహించగా, పెద్దపల్లి యూనిట్ కార్యదర్శి జమీరుద్దీన్, జామా మసీదు అధ్యక్షుడు మహమ్మద్ ఫసియుద్దీన్, ఖాజీ మహమ్మద్ ఇస్మాయిల్ నిజామీ తదితరులు పాల్గొన్నారు. వారు తమ ప్రసంగాల్లో ఉపాధ్యాయుల ఐక్యత, సౌభ్రాతృత్వం, సహకారం అవసరాన్ని వివరించారు.

కార్యక్రమంలో ఏలేశ్వర వెంకటేశం, అశోక్ రావు, రాజరత్నం, షంషుద్దీన్, కె. రమేష్, చిలుక ప్రసాద్, ముఫ్తీ ఎం.డి. ఇర్షాదుల్లా ఖాన్, ఎం. విజయానంద్ తదితరులు మాట్లాడుతూ, విద్యా రంగంలో ఎదురవుతున్న సవాళ్లను ఎదుర్కొవాలంటే ఉపాధ్యాయ సంఘాల ఐక్యత ఎంతో అవసరమని పేర్కొన్నారు.

ముగింపులో యూనిట్ కార్యదర్శి మహమ్మద్ జమీరుద్దీన్ వాజిద్ ధన్యవాదాలు తెలుపగా, అధ్యక్షుడు సయ్యద్ జావిద్ అక్మల్ హుస్సేనీ ముగింపు ప్రసంగం చేశారు.

ఈ ఈద్ మిలాప్ కార్యక్రమం ఉపాధ్యాయ సంఘాల మధ్య ఐక్యత, సామరస్యం, సహకారానికి నూతన దారులు చూపింది. భవిష్యత్తులో కూడా ఇలాంటి కార్యక్రమాల ద్వారా విద్యాభివృద్ధికి కట్టుబడి పనిచేస్తామని నిర్వాహకులు తెలిపారు.