10 వేలు లంచం తీసుకుంటూ ఏసీబికి చిక్కిన కొమురవెల్లి గ్రామ పంచాయతీ కార్యదర్శి

 

సిద్దిపేట జిల్లా కొమురవెల్లి గ్రామ పంచాయతీ కార్యదర్శి ఎసిబి వలలో చిక్కాడు. కొమురవెల్లి గ్రామం, మండలానికి చెందిన పంచాయతీ కార్యదర్శి గడ్డం రాజుగౌడ్‌ను అవినీతి నిరోధక శాఖ (ఎసిబి) అధికారులు 11-05-2026 సాయంత్రం 4.40 గంటల సమయంలో గ్రామ పంచాయతీ కార్యాలయంలో రెడ్ హ్యాండెడ్‌గా పట్టుకున్నారు.

ఫిర్యాదుదారుడి ప్లాట్‌లో గ్రామ పంచాయతీ ఏర్పాటు చేసిన డ్రైనేజీ పైప్‌లైన్‌ను తొలగించేందుకు అధికార సహాయం చేయడానికి రూ.10,000 లంచం డిమాండ్ చేసినట్లు ఎసిబి తెలిపింది. ఈ లంచం మొత్తాన్ని సర్పంచ్ గొల్లపల్లి పద్మ భర్త గొల్లపల్లి అంజనేయులు ద్వారా స్వీకరిస్తుండగా అధికారులు పట్టుకున్నారు.

లంచం మొత్తమైన రూ.10,000ను ఎ-2 అంజనేయులు వద్ద నుంచి స్వాధీనం చేసుకున్నారు. ప్రజా విధులను నిజాయితీగా నిర్వహించాల్సిన అధికారి అక్రమ లాభం కోసం అవినీతికి పాల్పడినట్లు ఎసిబి పేర్కొంది.

ఈ కేసులో పంచాయతీ కార్యదర్శి గడ్డం రాజుగౌడ్ (ఎ-1), గొల్లపల్లి అంజనేయులు (ఎ-2)లను అరెస్టు చేసి హైదరాబాద్‌లోని ఎస్పీఈ & ఎసిబి కేసుల విచారణకు సంబంధించిన రెండో అదనపు ప్రత్యేక న్యాయమూర్తి ఎదుట హాజరుపరచనున్నట్లు వెల్లడించింది. కేసు దర్యాప్తులో ఉంది. ఫిర్యాదుదారుడి వివరాలను భద్రతా కారణాల రీత్యా గోప్యంగా ఉంచినట్లు అధికారులు తెలిపారు.

ప్రభుత్వ ఉద్యోగులు ఎవరైనా లంచం డిమాండ్ చేసినట్లయితే ప్రజలు ఎసిబి టోల్ ఫ్రీ నంబర్ 1064కు ఫిర్యాదు చేయాలని అధికారులు సూచించారు. అలాగే వాట్సాప్‌ (9440446106), ఫేస్‌బుక్‌లో “Telangana ACB”, ఎక్స్‌ (ట్విట్టర్‌)లో “@TelanganaACB” ద్వారా కూడా సంప్రదించవచ్చని తెలిపారు.