కుంకుమభాగ్య నటి సంచిత ఉగాలే మృతి.. టెలివిజన్ పరిశ్రమలో విషాదం

కుంకుమభాగ్య నటి సంచిత ఉగాలే మృతి.. టెలివిజన్ పరిశ్రమలో విషాదం

ముంబై: హిందీ టెలివిజన్ ప్రేక్షకులతో పాటు తెలుగు ప్రేక్షకులకు కూడా సుపరిచితమైన 'కుంకుమభాగ్య' సీరియల్ నటి సంచిత ఉగాలే (22) మృతి చెందడం సినీ, టెలివిజన్ వర్గాల్లో తీవ్ర విషాదాన్ని నింపింది. ఆదివారం సాయంత్రం ముంబైలోని తన నివాసంలో ఆమె అనుమానాస్పద పరిస్థితుల్లో మృతి చెందినట్లు జాతీయ మీడియా వెల్లడించింది.

'కుంకుమభాగ్య', 'వాగ్లే కీ దునియా' వంటి ప్రముఖ సీరియల్స్‌లో నటించిన సంచిత ఉగాలే, తన నటనతో మంచి గుర్తింపు తెచ్చుకుంది. 'కుంకుమభాగ్య' సీరియల్‌లో దియా టాండన్ పాత్ర ద్వారా ప్రేక్షకుల ఆదరణ పొందింది. అలాగే విక్కీ కౌశల్ ప్రధాన పాత్రలో నటించిన 'ఛావా' చిత్రంలో తారా రాణి చిన్ననాటి పాత్ర పోషించి ప్రశంసలు అందుకుంది.

ఇప్పుడిప్పుడే కెరీర్‌లో మంచి అవకాశాలు దక్కించుకుంటున్న సమయంలో ఆమె మృతి చెందడం అభిమానులతో పాటు టెలివిజన్ పరిశ్రమను తీవ్ర దిగ్భ్రాంతికి గురి చేసింది.

పోలీసులు తెలిపిన వివరాల ప్రకారం, ముంబైలోని నలాసోపరా ఈస్ట్, ఆచోలే విలేజ్ ప్రాంతంలోని సాయి సంతోషి బిల్డింగ్‌లో ఈ ఘటన చోటుచేసుకుంది. కుటుంబ సభ్యులు ఆమెను వెంటనే ఆసుపత్రికి తరలించగా, వైద్యులు అప్పటికే మృతి చెందినట్లు నిర్ధారించారు.

సమాచారం అందుకున్న పోలీసులు సంఘటనా స్థలానికి చేరుకుని ప్రాథమిక విచారణ చేపట్టారు. సంచిత తండ్రి మచ్చింద్ర ఉగాలే ఫిర్యాదు మేరకు ఆచోలే పోలీసులు భారతీయ నాగరిక్ సురక్ష సంహిత (BNSS) సెక్షన్ 194 కింద అపస్మారక మరణం (ADR)గా కేసు నమోదు చేశారు.

సంచిత ఉగాలే మృతికి గల ఖచ్చితమైన కారణాలు ఇంకా తెలియరాలేదని, అన్ని కోణాల్లోనూ దర్యాప్తు కొనసాగిస్తున్నామని పోలీసులు తెలిపారు.

సంచిత ఉగాలే ఆకస్మిక మృతి పట్ల పలువురు సినీ, టెలివిజన్ ప్రముఖులు సంతాపం వ్యక్తం చేస్తున్నారు. ఆమె కుటుంబ సభ్యులకు, అభిమానులకు ప్రగాఢ సానుభూతి తెలియజేస్తున్నారు.