మేడిపల్లిలో విషాదం.. యువతి చెరువులో మృతదేహంగా లభ్యం

 

మేడిపల్లిలో విషాదం.. యువతి చెరువులో మృతదేహంగా లభ్యం

మేడ్చల్–మల్కాజిగిరి జిల్లా మేడిపల్లి పోలీస్ స్టేషన్ పరిధిలోని పీర్జాదిగూడ శంకర్‌నగర్‌లో విషాద ఘటన చోటుచేసుకుంది. 27 ఏళ్ల యువతి చెరువులో మృతిచెందిన ఘటన స్థానికంగా కలకలం రేపింది.

పోలీసుల వివరాల ప్రకారం, విజయనగరం జిల్లాకు చెందిన తేజస్విని (27) మూడు నెలల క్రితం తన తల్లితో కలిసి శంకర్‌నగర్‌లో అద్దె ఇంటిలో నివాసం ఉంటోంది. శనివారం అర్ధరాత్రి సమయంలో ఆమె ఇంటి నుంచి బయటకు వెళ్లినట్లు తెలుస్తోంది. అనంతరం సమీపంలోని పీర్జాదిగూడ చెరువులో ఆమె మృతదేహం లభ్యమైంది.

సీసీటీవీ దృశ్యాల ఆధారంగా పోలీసులు ఘటనకు సంబంధించిన వివరాలను సేకరిస్తున్నారు. యువతి ప్రవర్తనలో ఇటీవలి కాలంలో అసాధారణ మార్పులు కనిపించాయని, ఆమె మానసిక ఆందోళనలో ఉన్న అవకాశాన్ని కూడా పోలీసులు పరిశీలిస్తున్నారు. ఘటనకు ముందు సమీపంలోని బీరప్ప ఆలయం వద్దకు వెళ్లినట్లు ప్రాథమిక విచారణలో గుర్తించారు.

యువతి తల్లి ఫిర్యాదు మేరకు మేడిపల్లి పోలీసులు కేసు నమోదు చేసి దర్యాప్తు చేపట్టారు. మృతదేహాన్ని పోస్టుమార్టం నిమిత్తం ప్రభుత్వ ఆసుపత్రికి తరలించారు. ఘటనకు గల ఖచ్చితమైన కారణాలు దర్యాప్తు అనంతరం వెల్లడికానున్నాయి.