ఘోర రోడ్డు ప్రమాదం.. చెరువులోకి దూసుకెళ్లిన కారు.. ఐదుగురు దుర్మరణం

 

ఘోర రోడ్డు ప్రమాదం.. చెరువులోకి దూసుకెళ్లిన కారు.. ఐదుగురు దుర్మరణం

మధ్యప్రదేశ్, జూలై 25: మధ్యప్రదేశ్‌లోని రాజ్‌గఢ్ జిల్లాలో శనివారం జరిగిన ఘోర రోడ్డు ప్రమాదంలో ఐదుగురు ప్రాణాలు కోల్పోయారు. ఖుజ్నేర్ పోలీస్ స్టేషన్ పరిధిలోని భిల్ఖేడి జంక్షన్ సమీపంలో అతివేగంగా వెళ్తున్న కారు అదుపుతప్పి రహదారి పక్కనే ఉన్న చెరువులోకి దూసుకెళ్లింది. ఈ ప్రమాదంలో కారులో ప్రయాణిస్తున్న ఐదుగురు నీటిలో చిక్కుకుని మృతి చెందారు. ఈ ఘటనతో ఆ ప్రాంతంలో తీవ్ర విషాదఛాయలు అలుముకున్నాయి.

పోలీసుల వివరాల ప్రకారం, MP-09-CC-6414 నంబర్ గల కారు వేగంగా వెళ్తుండగా ఒక్కసారిగా అదుపుతప్పి నేరుగా చెరువులో పడిపోయింది. ప్రమాదం జరిగిన వెంటనే స్థానికులు గమనించి పోలీసులకు సమాచారం అందించారు. ఖుజ్నేర్ పోలీస్ స్టేషన్ ఇన్‌చార్జి రవి ఠాకూర్ తన సిబ్బందితో కలిసి వెంటనే సంఘటనా స్థలానికి చేరుకుని గ్రామస్థుల సహకారంతో సహాయక చర్యలు ప్రారంభించారు.

చెరువులో మునిగిపోయిన కారును ఎంతో శ్రమించి బయటకు తీశారు. అనంతరం కారులో చిక్కుకున్న ఐదుగురిని వెంటనే ఆసుపత్రికి తరలించగా, వైద్యులు పరీక్షించి అప్పటికే వారు మృతి చెందినట్లు నిర్ధారించారు. ప్రాథమిక విచారణలో కారు తలుపులు, కిటికీలు పూర్తిగా మూసి ఉండటంతో లోపల ఉన్నవారు బయటకు రాలేకపోయినట్లు పోలీసులు వెల్లడించారు. వారిని రక్షించేందుకు కిటికీలను పగులగొట్టే ప్రయత్నం చేసినప్పటికీ అప్పటికే ఆలస్యమైందని తెలిపారు.

మృతుల జేబుల్లో లభించిన గుర్తింపు పత్రాల ఆధారంగా వారి వివరాలను గుర్తించే ప్రయత్నం కొనసాగుతోంది. ప్రాథమిక సమాచారం ప్రకారం వారు అర్నియా ఖుర్ద్, అవంతిపూర్ బరోడియా, మోహన్ బరోడియా, హతాయ్ ఖేడా గ్రామాలకు చెందిన వారిగా భావిస్తున్నారు. అయితే కుటుంబ సభ్యులు వచ్చి గుర్తింపు నిర్ధారించిన అనంతరమే అధికారికంగా వారి పేర్లను ప్రకటిస్తామని పోలీసులు వెల్లడించారు.

మృతదేహాలను పోస్టుమార్టం నిమిత్తం మార్చురీకి తరలించారు. ప్రమాదానికి అతివేగమే కారణమా, లేక వాహనంలో సాంకేతిక లోపం ఏదైనా ఉందా అనే కోణాల్లో పోలీసులు దర్యాప్తు చేపట్టారు. ఈ విషాద ఘటన రాజ్‌గఢ్ జిల్లాలో తీవ్ర విషాదాన్ని నింపగా, మృతుల కుటుంబాల్లో శోకసంద్రం నెలకొంది.