సింగరేణి అధికారుల ప్రధాన డిమాండ్లతో నిరాహార దీక్షలు.. సీఎంఓఏఐ ఆందోళన

సింగరేణి అధికారుల ప్రధాన డిమాండ్లతో నిరాహార దీక్షలు.. సీఎంఓఏఐ ఆందోళనకు HMS మద్దతు 

భద్రాద్రి కొత్తగూడెం, జూలై 2: సింగరేణి సంస్థలో పనిచేస్తున్న అధికారుల ప్రధాన సమస్యలను పరిష్కరించాలని డిమాండ్ చేస్తూ కోల్ మైన్స్ ఆఫీసర్స్ అసోసియేషన్ ఆఫ్ ఇండియా (CMOAI) సింగరేణి విభాగం ఆధ్వర్యంలో భద్రాద్రి కొత్తగూడెం జిల్లా సింగరేణి ప్రధాన కార్యాలయం ఎదుట నిరాహార దీక్షలు కొనసాగుతున్నాయి. ఈ దీక్షా శిబిరాన్ని హెచ్‌ఎంఎస్ సెంట్రల్ కమిటీ కార్యదర్శి ఖాజీ మొహమ్మద్ ఇస్మాయిల్ నిజామీ సందర్శించి సంఘీభావం తెలిపారు. అధికారుల న్యాయమైన డిమాండ్లకు పూర్తి మద్దతు ఉంటుందని ఆయన పేర్కొన్నారు.

ఈ సందర్భంగా సీఎంఓఏఐ నాయకులు మాట్లాడుతూ, కోల్ ఇండియా లిమిటెడ్ (CIL) అధికారులకు అమలు చేసిన Pay Upgradationను సింగరేణి (SCCL) అధికారులకు కూడా తక్షణమే అమలు చేయాలని డిమాండ్ చేశారు. ఒకే రంగంలో విధులు నిర్వహిస్తున్న అధికారుల మధ్య వేతనాల్లో వివక్ష ఉండకూడదని స్పష్టం చేశారు.

అలాగే 2022-23, 2023-24 ఆర్థిక సంవత్సరాలకు సంబంధించిన పనితీరు ఆధారిత ప్రోత్సాహక వేతనం (PRP) బకాయిలను వెంటనే విడుదల చేయాలని కోరారు. ఈ బకాయిల చెల్లింపులో జాప్యం కారణంగా అధికారులు ఆర్థికంగా నష్టపోతున్నారని ఆవేదన వ్యక్తం చేశారు.

సింగరేణి అధికారులకు పారదర్శకమైన పదోన్నతులు, బదిలీల విధానం అమలు చేయాలని కూడా వారు డిమాండ్ చేశారు. సీనియారిటీ, అర్హత ఆధారంగా ప్రమోషన్లు, బదిలీలు చేపట్టేలా స్పష్టమైన విధానాన్ని రూపొందించాలని కోరారు.

సంస్థ భవిష్యత్ అభివృద్ధిని దృష్టిలో ఉంచుకుని కొత్త బొగ్గు బ్లాకులను కేటాయించాలని ప్రభుత్వాన్ని విజ్ఞప్తి చేశారు. కొత్త గనులు లేకపోతే ఉత్పత్తి, ఉద్యోగ భద్రత, సంస్థ విస్తరణపై ప్రతికూల ప్రభావం పడే అవకాశం ఉందని తెలిపారు.

తమ న్యాయమైన డిమాండ్లపై సింగరేణి యాజమాన్యం, రాష్ట్ర ప్రభుత్వం, కేంద్ర ప్రభుత్వం సానుకూలంగా స్పందించి వెంటనే చర్యలు తీసుకోవాలని కోరిన అధికారులు, సమస్యలు పరిష్కారం కాకపోతే భవిష్యత్తులో తమ ఆందోళనలను మరింత ఉధృతం చేస్తామని హెచ్చరించారు.