ఇక కేసీఆర్ ఫొటో పెట్టుకోను... కవిత సంచలన ప్రకటన!

అక్టోబర్ 25న నిజామాబాద్‌ నుంచి ‘జాగృతి జనం బాట’ యాత్ర ప్రారంభం

నిజామాబాద్‌, అక్టోబర్‌ 15 : తెలంగాణ జాగృతి అధ్యక్షురాలు, మాజీ ఎమ్మెల్సీ కల్వకుంట్ల కవిత సంచలన వ్యాఖ్యలు చేశారు. అక్టోబర్‌ 25 నుంచి ఫిబ్రవరి 13 వరకు 33 జిల్లాల్లో ‘జాగృతి జనం బాట’ పేరుతో రాష్ట్రవ్యాప్తంగా యాత్ర చేపట్టనున్నట్లు ప్రకటించారు. అయితే, ఈ యాత్రలో మాజీ సీఎం కేసీఆర్ ఫోటోను ఉపయోగించబోనని స్పష్టం చేశారు.

“జాగృతి కార్యక్రమాల్లో గతంలో కేసీఆర్ గారి ఫోటోను పెట్టుకున్నాం. కానీ ఇప్పుడు నేను ఆ పార్టీలో లేను. కాబట్టి నా యాత్రలో ఆ ఫోటో ఉండదు. నేను చెట్టు పేరు చెప్పుకొని బతకలేను. ఆ చెట్టు నీడలో ఉన్నంత వరకు దాన్ని దుర్మార్గుల బారి నుంచి కాపాడేందుకు ప్రయత్నించాను,” అని కవిత వ్యాఖ్యానించారు.

తాను నిజామాబాద్ ఎంపీగా పోటీ చేసే వరకు కూడా జాగృతిలో కేసీఆర్ ఫోటో పెట్టలేదని గుర్తుచేశారు. “నా దారిలో నేను వెళ్తున్నాను. కాబట్టి ఇప్పుడు కేసీఆర్ ఫోటో పెట్టుకోవడం నైతికంగా సరైంది కాదు,” అని తెలిపారు.

ప్రజలతో మమేకమవడమే ఈ యాత్ర ప్రధాన లక్ష్యమని కవిత పేర్కొన్నారు. “ప్రజలు ఏమి అనుకుంటున్నారు, వారికి ఇప్పుడు ఏం కావాలి, తెలంగాణ వచ్చిన తర్వాత ఏం సాధించాం — అన్నది తెలుసుకోవాలనుకుంటున్నా,” అని చెప్పారు.

తాజా సమాచారం ప్రకారం, కవిత యాత్రలో ప్రొఫెసర్‌ జయశంకర్‌ గారి ఫోటో ప్రధానంగా ఉండనుందని, బీసీ అభివృద్ధి, ప్రజా సంక్షేమమే ప్రధాన ఎజెండాగా ఉండనుందని తెలుస్తోంది.

జూబ్లీహిల్స్ ఉప ఎన్నిక తమకు పెద్ద విషయం కాదని, తెలంగాణ భవిష్యత్తే అసలు అంశమని కవిత స్పష్టం చేశారు. “పార్టీ నన్ను సస్పెండ్ చేసిన తర్వాత ఎమ్మెల్సీ పదవిపై నాకు వ్యామోహం మిగల్లేదు,” అని చెప్పారు.

తెలియజేయదగిన విషయం ఏంటంటే — బీఆర్ఎస్ అధినేత కేసీఆర్ పార్టీ వ్యతిరేక వ్యాఖ్యలు, కార్యకలాపాలపై కవితను సస్పెండ్ చేయగా, మరుసటి రోజే ఆమె పార్టీ ప్రాథమిక సభ్యత్వంతో పాటు ఎమ్మెల్సీ పదవికి కూడా రాజీనామా చేశారు. ఈ నేపథ్యంలో ఆమె చేపట్టనున్న “జాగృతి జనం బాట” యాత్ర రాష్ట్ర రాజకీయాల్లో ప్రాధాన్యత సంతరించుకుంది.